domenica 29 marzo 2009

LA CICOGNA AL GRASPO - a.s.





Pubblicato su “Thiene e la Pedemontana” in distribuzione a Thiene
.
La cicogna al Graspo
.
Sentendo le ventun cannonate a salve, tutti, a Lugo, capirono che era nato il Principe ereditario, il discendente del re della risata, nonché poeta, medico e speziale, orafo (mago?, novello re Mida?) in più generoso animo d’oro. Guardandosi intorno, contenti i paesani già pregustavano una bella bevuta o, i più fortunati, “na gran magnada” su al Monte, mentre sulla ciminiera della latteria già troneggiava una grossa cicogna sul nido ad annunciare l’arrivo del toso.
Di nipoti, al Graspo, ne sono arrivati tanti e molti ne nasceranno ancora, indipendentemente dalla vena poetica dei nonni, ma Nicola, il neonato, è speciale essendo il primo nipotino di Claudio Cappozzo (e della sua Assunta). Questo spiega tutto.
Sussurrano in giro che il nonno sovrano (peccato, nonno così giovane e prestante!) abbia portato il fresco e nobile rampollo a vedere subito i beni del reame. Il piccolino, fra i nastri e i vestitini tricottati con tenerezza da nonne e bisnonne, cullato amorevolmente da Claudio, avrà forse pensato alla noia del suo rango. Passare dalla pianura nebbiosa di Ciùpese (Dueville), sostare a lungo sulle infinite rive dell’Astico e sulle colline di Lugo e raggiungere la culla del casato a Monte di Calvene e in più visitare malghe, stalle moderne, vigneti, cantine e cantieri, avrà frastornato un po’ il neonato! Chissà forse avrà pensato: ”Che mi diverta a vivere come nonno Claudio, poetando un po’ e chiacchierando in giro con la ganassa de mas-cio in mano, o che lavori sodo con la vendemmiatrice come il papà?”
Forse, sentendosi così amato e così importante, avrà deciso di rinviare la scelta. Tanto… anche se la borsa va giù, l’oro va su e i campi restano! (a.s.)
.

lunedì 16 marzo 2009

CASA MIA - Mariano Guzzonato


LUGO – 14 MARZO 2009
- - Filò col Graspo - -
.
CASA MIA

Me piase el posto indove ca sto,
qua ghe son nato, no in ospedale;
fin da picolo, questo mi so,
e scrito in tel libro comunale.

Da la me casa vardando 'l sole,
canpagna verta davanti a mi
e girando, drìo de le me spale,
arco de monti de fronte al dì.

Mureta, corte, orto e giardin,
pì 'n là un parcheto, alte le piante;
na palissata a far da confin,
co' la so siesa, poco distante.

De drìo de casa un portegheto,
do strìssie de piastre d'un bel viale,
oto frutari rento un canpeto
e pì su, i filari del vignale.

Tuta 'sta roba me 'a tegno cara,
mi ghe sto drìo da matina a sera;
co magno 'e nose de 'a me nogara
gusto 'l profumo de la me tera.

Gera casa grande, patriarcale,
primi otossento, diséa me noni;
portego, tèse, punari e stale,
el cesso fora pa' i so bisogni.

Adesso xe sta rimesso a posto,
co' i so servissi e tuto par bon,
ma un bel ricordo mi go tegnesto,
quel de 'stiani, gran cusinon.
.

sabato 14 marzo 2009

VITA NÓVA - Bepin Daecarbonare

.

LUGO – 14 MARZO 2009
Filò col Graspo

VITA NOVA

L’ano vecio pitosto malandà
el novo nato ga in pressa saludà.
Intanto dal bonbaso
el nono del Domìle,
ociando da la cuna
fodrà de seda e raso,
el resta inpressionà.
On camaron de jente de ogni condission
lo sìdia de richieste, lo mete in confusion.
I stròloghi coi maghi,
befane e fatuchiere,
d’acordo col Poiana
coi péndoli e le sfere,
promete... la bobana:
salute, amor, benèssare,
crocere torno al mondo,
e de palanche tante:
on pósso sensa fondo.
Invesse l’ano novo par contentare tuti,
vardando su tel celo domanda la BONTA’.
E... dopo el se indormensa
strenzendo tei pugneti
el sogno de ogniùn:
na man tacà chel’altra
che liga e no se lassa,
na fila longa longa
.

PRIMAVERA - Cecilia Tribbia

.

LUGO – 14 MARZO 2009
Filò col Graspo

PRIMAVERA

Su l'orto stamatina un mar de fiuri
tacà la mandolara e 'l pino grande.
Son nata e so' invecià con luri,
drento a sti muri de la casa nova.
La musica scoltava e le speranse,
vardando el cel con qualche nuvolon
e i me tusiti fare canpanon.
Alora co' la scoa spacava el mondo
ma in verità scrivéa su l'aqua...
Le sento sussurà chele parole:
“Biòn fare la lession sensa far mace,
conprè 'l penin, a scola se sta 'tenti
e no se fa le rece in te 'l quaderno!”
E fora scapava a laorare.
Ma co xe sera, libri su 'a tola,
minestra freda sul piato,
e mi che i me badava fa un can straco.
Na guera me tocava scatejàre,
po' i vardava dormire tacà so pare
e tornava in cusina sonar la me solfa.
Vardar sachéte, tacare un boton,
netàre scarpe, stirar traversoti.
Anca d'inverno, col fredo,
la gera par mi primavera
e fiuri sbòciava lí intorno.
.

COSSA GAVÌU? - Marcella Zordan

.

LUGO – 14 MARZO 2009
Filò col Graspo

COSSA GAVÌU ?...

Stéle de bucaneve un fià roàne,
cossa gavìu, vergogna de spanare
ca ve tegnì chei bòcoli tacà
soto onbrele de foje?
E ti, cavasso de calicanto
inbrufolà de zalo,
fetu posta inbrojare seleghete
o xelo tuo dal bon, fredo che sìe,
l’inbròjo de stajon?
E valtre, viole
vestìe de sbiavo, gnanca fussi nà
ruscare ‘te l’armaro dei coluri
de l’an passà?...
Parché no sento pì
chel canto forte e ténaro de sti ani
inprofumà de bon?
Scometo che
fare un masso mi ve contentarìa,
bandiera fresca de quel prà pì verde
co’ torno man che sa de bociarìa...
.

EL MERLO INAMORÀ - Mirta Fabris

.

LUGO – 14 MARZO 2009
Filò col Graspo

EL MERLO INAMORÀ

Da on ramo oncora spojo de na pianta,
on merlo lìssio, piturà de china,
‘pena che spunta l’alba trendarìna,
se sgola in sentimento, el fis-cia, el canta…

El segna primavera quasi spanta,
sbocià el narciso e ‘a viola, la regina,
l’aria s’à lavà e fata bela fina,
sento che ‘l cor se slarga e l’ansia sfanta…

Ma go sòno e bróntolo, son sincera,

parché ogni dì sto sior a l’alba me svéja;
no podarìa bastarghe cantar a ‘a sera?

Pian pian me chieto e po’, te ‘l dormivéja,
tifo pa ‘l merlo inamorà, che spera
catar na sposa e farse na fameja.
.

L’ORGANO - Carlo Ciscato

.

LUGO – 14 MARZO 2009
Filò col Graspo

L’ ORGANO

Stasera vardo, el sole a l’orisonte
l’è drìo spenelare de coluri
el celo e le montagne su le ponte
che ‘e pare inghirlandà de tanti fiuri.

De colpo sento un organo che sona:
xe el vento che ‘l tol su la sinfonia,
dai buschi e le valate za rintrona
le note, soni, canti e melodia.

Le gùlie del Pasubio e del Carega
se slancia come cane su nel celo
che col so sono alto par che ‘e prega
la note, za calà col scuro velo.

Dal Cengio, dal Paù e dal Suman
s’inpissa na luceta, par che ‘a dansa,
al mondo par che ‘a diga che doman
col sole nasse ancora la speransa.

La luna come un grande musicista
dirige un gran concerto co’ le stele
e tute le creature ne la pista
le bala e canta lodi, le pì bele!
.

DOPO LA PIOVA - Luciana Lobba

.

LUGO – 14 MARZO 2009
Filò col Graspo

DOPO LA PIOVA

Nel celo griso
l’arcobaleno,
nel campo mojo
spighe de grano.

Butà de traverso,
come a dormire
dopo un lungo
strapasso,

slusega te ‘a siesa
perle de piova
posà sora le foje
caressà da l’ultimo
ragio del sole.

Spìa na lumega,
la slonga i corniti,
la beve na giossa
e la torna nel sgusso.

Passa i rondoni
fin rasotera,
d’un fià m’inacorzo
che cala la sera.
.

GIORNATA SERENA - Cecilia Casarotto

.

LUGO – 14 MARZO 2009
Filò col Graspo

GIORNATA SERENA

Un bel dì son stà a Ciupan
dove vao par devossion:
me abrassava le montagne
e ‘l sol tiepido de ‘a stajon.

Sentivo intorno un’aria
che màsena i ricordi
de tanti ani fa
sfiorar la fantasia.

La ga servìo a ridarme
el profumo del bon pan
le calorìe del forno
da mai desmentegà.

Tornando a la me gente,
a quel che xe restà,
rumegava la me mente
pensando a la bela età.

Par verzarme un po’ fora
e darme un fia’ de vita
scumìssio a caminare
varcando una salita.

Arivo in sima a un monte
e vedo el me paese,
de fianco al bel torente
do bando a le pretese.

Se ga scaldà el me core,
me sento na regina,
Ciupan l’è sempre quelo,
‘l me fa sentir banbina!
.

VECIO SALGÀRO - Tita Palanca (;Lino Gandin)

.

LUGO – 14 MARZO 2009
Filò col Graspo

VECIO SALGÀRO

Zo pai teràji de l’Àstego,
doe che ‘l trodo
schinca inbriago
e, ingobandose tra i sassi,
te on stramaro el se perde
de ortighe e cavassi,
on vecio salgàro,
che st’istà gera verde,
el fa da confin.
On gnaro fruà par corona,
du gropi come du oci,
on crepo de boca sdentà,
du rami spalancà
che soméja du brassi.
Imus-cià verso note,
sventrà verso el dì,
anca lu on poro cristo
spuntà propio lì…
.

VECIA FATORIA - Bruna Bonotto

.

LUGO – 14 MARZO 2009
Filò col Graspo

VECIA FATORIA

Soto ai ragi caldi del sole,
su prà verdi e spassi imensi,
schene curve, poche parole,
e giorni de lavori intensi.

Torna a casa ‘l contadin
da le strùssie conpagnà.
Ghe va incontro el so putin
soto ‘l celo che arde de istà.

Terminà le dure fadighe
cade ‘l silensio so la sera;
sbòcia un sogno de bionde spighe
e anca l’aria se fa lesiera.

Se la tera podesse parlare
de tante stajon zolà via,
corarìa ancora lagrime amare
e l’eco de na storia ormai finìa.

Desso l’aria no ga profumo
e le piante ga perso ‘l colore;
romba i motori, i sémena fumo..
e la campagna vive in dolore.

NA SANA PASSION - Lella Parise

.

LUGO – 14 MARZO 2009
Filò col Graspo

NA SANA PASSION

Te le càssie, là in fondo al boscheto,
a ghin trovo a faméje ciudini:
un profumo te ‘l so capeleto,
mi li fasso secondi ai porcini…
E smissiài a quei del me prà
qualche altro che trovo ne ‘e soche,
a inprofumo co i fasso a contrà
che ghe asso la voja in te ‘e boche.
Qualche volta co vo su in montagna
a trovare te l’erba le onbrele,
a le friso e le conso co’ ‘a pana
e le gusto in delirio anca quele.
Ogni ano spetémo che ‘l tenpo
fassa el bravo e ‘l ne daga un urton,
fassa nàssare i funghi in chei posti
contentando la nostra passion.
.

BRONSE QUERTE - Irma Lovato

.

LUGO – 14 MARZO 2009
Filò col Graspo

BRONSE QUERTE

Bate in te la stua
el core de fagàro,
spìa fora pal camin
par farghe el bafo a genaro.

Bate ne ‘a note freda
na sgresénda de moraro,
rento la fogara
la vol farse el gnaro.

Sora un cussin de sénare le se riposa
na brancà de stèle querte de corsa,
le fa finta de dormire russando un fià,
semenando el caldo de le istà passà.

Na poesia…
con afeto te go scrito,
bronsa querta del me bosco,
principessa in tel me leto:

pa’ scaldarme i nissói no te te sparàgni,
par cunare i me sogni te assi andare i to bei ani.
Co ‘l vento pètena la Vale de aria fina,
bate soto na querta molesìnana bronsa de fagaro
che no vedarà matina.
.

LA SCHINCA - Giuseppe Segalla

.

LUGO – 14 MARZO 2009
Filò col Graspo

LA SCHINCA

Quando che ‘l Padreterno, bontà sua,
te sùpia in peto l’anima e te vivi,
questa xe fata fa na giossa de àcoa.
Pol capitare, una so on milion,
che la sia come on rìssolo de buro:
te resta lora ‘l dono de la schinca,
un sguìsso da bisato che te incanta.
Ti pensa che anca ‘l vate Meneghelo
el ghin à scrito sbonbo de emossion.
La schinca no xe roba che se inpara
gnanca a fruàrghe drìo la vita intiera.
La xe come on s-ciantìso de la mente
che fa sonar so l’atimo che serve
el mèjo de l’orchestra muscolare.
El poro can che te se para vanti,
se te vè a drita lù narà a sinistra,
o fursi ‘l finirà inciodà par tera,
a domandarse cossa sia sucesso.
La schinca l’è on baleto, l’è on rondò,
l’è come on acuto de bel canto
fato pa’ incantismare e stravanire…
E qua lo digo, lo confesso pian:
mi lo gavévo el dono de la schinca!
.

LA BANDA - Floriano Zambon

.

LUGO – 14 MARZO 2009
Filò col Graspo


LA BANDA

Na volta, de domenega matina,
o co jera le feste comandà,
te rivava, portà da l’aria fina,
la musica de ‘a banda de ‘a sità.
Incoadrà par la strada come alpini,
coi tronboni sul tenpo dei tanburi,
smissiando ben i flauti coi clarini,
i nava vanti sgoèlti e ben sicuri.
E mi ca jero bocia, co’ me opà,
a me sentéa zolare come oselo,
restava lì a vardarli inbanbolà.
Gnente in tel mondo me paréa pì belo,
le note, come perle ben postà,
ghe dava n’altra luce fin al celo.
.

A CLAUDIO - Miranda Bille


LUGO – 14 MARZO 2009
Filò col Graspo

A CLAUDIO

(dedicata a Claudio
“Dotore in medesina pop.”)

Nessun fa ti
sa vìnser le patùrnie
che tanti se strassìna
dentro al core.
Basta na frase
e ti, da vero artista
come puchi,
“studioso de rimedi naturali”,
te fe sgropar
le lagrime pì amare,
nel rìdare de gusto,
e te regali na liberassion
che né pastilie
e né doturi laureà
no i ga inparà gnancora
a procurare.

FESTA - M.Linda Cicchelero


LUGO – 14 MARZO 2009
Filò col Graspo
Festa
’Te la me contrà, in gaja a ogni stajon,
nasséa agnei, cavrìti, vedelìti,
nidià de pulzini e sbrancà de uselìti.
La zera senpre ’na festa
pa’ le creature da poco a la vita afacià.
Ma quando nasséa ’n toseto,
alora la festa zera ’na festa rento la festa.
Tuta la contrà se faséa so la porta
e coréa chel ciacolar contento:
« L’è ’n mas-ceto, l’è na toseta,
l’è biondo, l’è moro, l’è risso, l’è pelà ».
’N novo celo paréa se fusse svelà.
Nuvi pensiéri, vece fisionomie,
ritorni de primavere in bianche stajon
de ani e de neve incanutìe.
La gioia se sbrissolava de man in man
par catàrse tuta
’nte i oci de veludo de la mama,
fresca de dolore desmentegà,
’n tel picolo miracolo a la Vita afidà.

UN MONDO DE SOGNO - Leda Ceresara Rossi


LUGO – 14 MARZO 2009
Filò col Graspo


UN MONDO DE SOGNO

(dedicata a Firmino Brazzale)
Te ‘l grande senario dei monti
la vita se fa generosa,
col rosso infogà dei tramonti,
co’ albe de argento e de rosa,
e ‘l blu de le note pì bele,
con pergole fate de stele.

E l’anima tua de poeta
te porta pa’ buschi e sentieri,
là dove la mente se chieta
e sensa pì ansia e pensieri
te scolti ogni àrfio, ogni vosse,
che solo ‘l to core conosse.

Co’ oci de eterno putelo
te vardi ‘l to mondo incantà,
spiando ogni gnaro de oselo
e l’àcoa del fosso che va,
un fiore che sbocia tra i sassi,
le pèche de ‘a volpe e dei tassi.

E quando te l’aria turchina
da l’alto del monte zolando
vien l’aquila, grande regina,
te ‘l core se fa ancor pì grando
e ancora pì vivo ‘l bisogno
de stare in sto mondo de sogno.
.

VOSSE DEL TENPO - Leda Ceresara


LUGO – 14 MARZO 2009
Filò col Graspo

Vosse del tenpo

Camino longo strosi che conosso
da sola, vao pianìn, contando i passi,
me ricordo ogni curva che fa ‘l fosso
e ‘l ciacolar de l’àcoa sora i sassi,
e ‘l pontesèl de legno dove ancora
le tole sgrensa a caminàrghe sora.

Da senpre qua ghe xe un silensio fondo
apena roto da un sospir de vento,
epure in te sta frégola de mondo
mile vosse me parla e mi le sento:
vosse fermà dal tenpo chi sa come
che me invita ciamàndome par nome.

El sole crea ricami de oro ciaro
filtrando de traverso tra le foje
e l’aria ga l’aroma dolse-amaro
de legno vecio, mus-cio e erbe moje;
le piante sentenàrie sa ogni storia
che me porto stanpà ne la memoria.

So che qua in fondo l’eco ghe xe ancora
e, se lo ciamo come da putela,
l’eco me dà risposta come alora,
però la vosse no me par pì quela,
e ‘l viso che se spècia drento al fosso
fursi l’è mio, ma no lo riconosso.
.

EL ME ALBU DE NOSSE - Gisella Paolin


LUGO – 14 MARZO 2009
Filò col Graspo

El me albu de nosse
Braghe scure e mantelina:
la sposa, na toseta,
se veste al’incontrario!
Làgrime cala dai oci
de oposte anbission:
rason smorsà de na mama
o sodisfassion de la novissa
piena de corajo?
Zobia, el dì pena comissià.
Poca zente, ai puareti
no ghe va drìo nissuni.
L’organo de ‘a cesa,
sonà da ‘n amigo,
smìssia le so note
co’ ‘l ciacolar pacioloso
de anime parbèn.
Su la tola, dopo,
polenta e luànega.
La neve, tanta e giassà,
se desfa al passare
dei nostri córi caldi.
La sera,
ne la casa che
no conosse fogo,
fa fiama la passion.
.

CHI - Tarcisia Dal Santo

LUGO – 14 MARZO 2009
Filò col Graspo

Chi

Chi coi penèi pitura,
chi sona el mandolin,
chi sta zugare a carte
tacà un bicer de vin.

Chi vanga tuto l’orto,
chi fa na passegiata,
chi fa un gireto in piassa
opur na scampagnata.

Chi va ne la palestra,
chi invesse va balare,
chi mena i boce a scola
pa’ sercar de jutare.

Chi propio no pol móvarse
parché ga dei problemi
dòpara la passiensa
pa’ stare pì sereni.

Chi che sta lì a pensare
“ansian no xe mia belo”
i daga l’esperiensa
pressiosa fa’ un giojelo.

Chi xe che sta disendo
che no serve i ansiani?
Lóri ne sta insegnando
a sperar nel “Domani”.
.





SÉNARE - Ruggero De Rosso



LUGO – 14 MARZO 2009
Filò col Graspo

Sénare

Sentìo zente
el tempo che va
colorando le ore
de sènare
ma confondendone
co mile mestieri
e co pensieri
che ne parla
de imortalità?!

Cossa faremo quando
rivaremo là
andove no ghe sarà
più gnente
de tuto questo
via de nostro Signore
ch'el speta?
Mi ve digo:"
Speremo ch'el rida!"
.

NINA NANA - Galdino Pendin


LUGO – 14 MARZO 2009
Filò col Graspo

Nina nana

Du ocioni che sluse dal sono
e na vose de mama che cuna;
dal celo tri quarti de luna
che varda sta séna incantà.

Pianpian le dó stele se smorsa,
se sente s-ciocare un baseto,
se posta le coèrte del leto,
se sente pregare cussì:

Signor che te guidi el futuro,
protegi sta me creatura,
la vita par lu sarà dura
te un mondo de rabia strapien.

In meso a le insidie del male
e la corussion de la gente,
conservalo sempre inocente;
Signore, me fido de Ti!
.

sabato 7 marzo 2009

MODI DE DIRE DURANTE L’ANO - Bepin Daecarbonare


Da “Quatro Ciàcoe” de genaro 2009
Mensile de cultura e tradission vènete


- GENARO:
2 - S. Bovo - De S. Bovo la torta va al fogo. (torta fata de sangue de mas- cio).
6 - Epifania - La stria tute le feste scoa via.
17 - S. Antonio abate - S. Antonio fa el ponte e S. Paolo (25 genaro) lo ronpe.
20 - S. Sebastiano - S. Bastian co' la viola in man.
21 - S. Agnese - Da Sant'Agnese meso fen e mese spese.
22 - S. Vincenzo - S. Vincenzo da la gran fredura e S. Lorenso (10 agosto)da la gran calura, l'uno e l'altro poco dura.
- Quando el moscon camina de genaro, ciapa el rosegoto e mételo in granaro (far economia parché vien la carestia).
- De genaro tuti i gati va in gataro.

- FEBRARO:
2 - Candelora - Quando vien la Candelora da l'inverno semo fora, ma se piove o tira vento, ne l'inverno semo drento.
14 - S. Valentino - Par S. Valentin se veste 'l grande e anca el picinin.
- De S. Valentin fiorisse el spin.
- Febraro, febrareto curto e maledeto.

- MARSO:
19 - S. Giuseppe - Par S. Giusepe se buta via le grepe.
21 - S. Benedetto - Da S. Benedeto la sisila ze sul teto.
25 - Annunciazione - A Santa 'Nunziata se buta via la pignata (scaldin).
- De marso, ogni mato va descalso.
- Marso suto, aprii bagna, beato 'l contadin che ga semenà.
- Marso marson, tri dì de aqua e uno de bon.

- APRILE:
1-2-3 - Primi tre aprilanti, quaranta somejanti.
23 - S. Giorgio - Se piove da S. Giorgio, carestia de fighi.
25 - S. Marco - Quando S. Marco pasquarà tuto '1 mondo tremarà.30 - S. Caterina - Da S. Catarina da la stala a la cusina.
- Voja o no voja, a Pasqua ghe ze la foja.

- MAGIO:
1 - El primo de ghirlanda, quaranta dì comanda.
3 - S. Croce - Se piove da Santa Croce, va sbuse le nose.
4 - Ascensione - Se piove el dì de l'Assensa, el boaro perde la somensa.
25 - S. Urbano - Da S. Urbano, siarése a piene man.
- Majo ortolan, tanta paja e poco gran.
- De majo canta i mussi.

- GIUGNO:
11 - S. Bàrnaba - San Bàrnaba e san Simon, tegnime lontan da la sita e dal ton.
15 - S. Vito - Par San Vio, le siarese ga el marìo (verme).
29 - S. Pietro - Se piove de S. Piero, piove nel caliero.
- El mese de giugno inpiena el pugno (co la falsa in pugno).
- LUjO:
12 - S. Fortunato - De S. Fortunà, bravi quei che ga sapà.
22 - S. Maddalena - De S. Madalena, la nosa la ze piena.
26 - S. Anna - A S. Ana, la piova la ze na mana.
- Có le nuvole va al mare, toi sù i bo e va arare.

- AGOSTO:
1 - Al primo de agosto, le ànare se mete a rosto.
2 - Dal Pardon se tra la sapa te on canton.
7 - S. Gaetano - La verza de S. Ghitan i poi piantàrsela in man.
15 - Assunzione - L'aqua de la Madona l'è ancora bona.
16 - S. Rocco - De S. Roco, le nose va in sgaboto.
- Agosto maùra e setembre vendema.

- SETENBRE:
9 - S. Gregorio - Se piove de S. Gorgon, 7 brentane e on brentanon.
16 - S. Eufemia - Par Sant'Eufemia scomissia la vendemia.
21 - S. Matteo - De S. Matio ogni fruto l'è conpìo, el bel tenpo ze finìo e le vache torna indrìo.
- A luna setenbrina, sete lune se ghe inchina.

- OTOBRE:
7 - S. Giustina - Da S. Giustina l’ua rabosa deventa marzemina.
16 - S. Gallo - Se fa belo a S. Gai, fa belo fin Nadal.
28 - S. Simeone - A S. Simon se cava la ravissa e anca el ravisson.
- De ua marzemina gh'in va poca su la tina, e quela che la va la ze tuta becolà.

- NOVENBRE:
1 Ognissanti - Se tuti i Santi ronpe 'l tenpo, i morti lo justa.
- Fin ai Santi la somensa se porta su i canpi, da i Santi in là la se porta a ca', a san Martin la se porta al mulin.
11 - S. Martino - Da S. Martin l'inverno ze in camin.
- L'istadela de S. Martin dura tre jorni e un pochetin.
30 - S. Andrea - Da S. Andrea el fredo bècola.

- DISSENBRE:
2 - S. Bibiana - Se piove el dì de S. Bibiana, 40 dì e 'na stimana.
6 - S. Nicola - Vegnarò sa podarò (la neve).
13 - S. Lucia - Da Santa Lùssia el fredo crussia.
21 - S. Tommaso - Da S. Tomìo a Nadal i dì se slonga un pìe de gal.
25 - S. Natale - Nadale coi tui e Pasqua con chi che te vui.- La neve dessenbrina sete volte se raffina.