“NEVE DE DESSO” de Nani del Borgo; Presemtà dal domatore de strope Giovanni Bassan

.
.

Lugo di Vicenza 2010

Filò con “EL GRASPO”
Circolo Poeti Dialettali Veneti

.
--- NANI DEL BORGO---
(Mons. Giovanno Rossin)

--- Neve de desso ---

No la me piase pì, desso, la neve.
No la fa tenpo de vegner da l'alto
ch'el bissaboa del traffico el la beve
el la inpastrocia grisa so l'asfalto

Na volta sì la jera bela bianca!
Tuta na coerta i canpi, i prà, i sintieri;
mace de scuro no ghin gera gnanca,
solo i me oci grandi tacà ai veri.

Mi me godea vardar, bianche anca quele,
le pèche ricamà da l'oseleto
e se podava fresca so la pèle
na grande pase e on ciaro tendareto.

Desso te senti in giro dapartuto
na ruda de motori e de bordelo.
La neve se fa scura e mete el luto:
i ga copà el silensio, so fradelo.
.
.

“EL VENTO” - Ruggero De Rosso

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- El vento ---

El riva de boto
zo par la bocara
scorlando le piante
raspando par tera
branchinele de carte
zugando a gorfiarle
confà dei balòni

el grata a le porte
e su le finestre
el par quasi dirte"
su 'vanti vien fora"
e quando de colpo
va via la paura
el vento xe za
sbrissià cao in oltra

regalandone calma
'na grande armonia
e un tramonto.
de sogno
da perdarse via.
.

“MARSO” - Luciana Lobba

.
Lugo di Vicenza 2010

Filò con “EL GRASPO”
Circolo Poeti Dialettali Veneti


.
--- M a r s o ---


Campi sgrafà da l’erba seca,
paja, raìse, scartossi…
tera voltà soto sora,
siese incatijà
de rami sechi;
tuto quanto spolverà
da na pioveta fina.
Marso mese mato,
te ciami primavera:
lo vedo nel salice
petinà da man de fata
che gà mostrà
la natura pena nata,
foie picole
verde ciaro,
che slùsega
a na s-ciaroladel sole avaro.
.















.
















































0

“BIANCHE CIME” - Bruna Bonotto

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- Bianche cime ---

Lassù in meso a le alte cime
vestìe da un bel velo bianco,
la luce xe sensa confine
e intorno se spande l'incanto.
Camino pinpian tra la rocia
e ricordo le Pene Nere:
i fiori de le Alpi che sbocia,
a difesa de vali e frontiere.
Ne ‘a mente core le rime,
se ferma invesse ‘l pensiero:
co’ ′a vosse de le alte cime
na mama pianse ‘l so gueriero.
L'acqua la core via a salti
cocolà dai ragi del sole,
e nuvole fresche de smalti
sui monte le fa scapriole.
.

“VECI MORARI” - Mariano Guzzonato

.
Lugo di Vicenza

Filò con “EL GRASPO”
Circolo Poeti Dialettali Veneti

.

--- V e c i m o r a r i ---


’Na fila de morari vissin casa,
che de sicuro me ga visto nàssare
e via col tenpo me ga visto crèssare,
vardandoli mi ’ncò bison ca tasa;
e un rigolo me core su ’e massele
vedendo gente intorno indafarà
tajare rami e legna in quantità,
’na volta cavà su... par fare stèle.

A penso a quele istà ne la canpagna
quando che ’l caldo sofego brusava,

a la so onbra mi me rapossava,
e gera fresco come su in montagna;
e ghe domando: “Ma xe propio vero
che finirè ne ’a stua par fare fogo?
’na parte de ’a me vita mi me togo,
pur de saverve qua, e son sincero!
Disìme valtri, morariti mie,
sperando che le rame ’ncor me sconda,
co’ me ghi visto bocia co’ la fionda,
me odiavi sì, no stè contar busìe.”

Mi taso e scolto, ma no sento gnente,
solo un supion de vento passa via,
che fa tornare indrìo la nostalgia
de vosse de fameja, de ’a me gente.
Ma un morareto picolo me dise,
che sora ai altri ghéa de pì corajo:
“Varda che tuti no ’ndaremo al tajo;
saremo cavà su, ma co ’e raìse;
e i va a strapiantarne su un filaro
de un posto mejo, ca no conossemo;
i ne ga dito che pì ben staremo!”
Mi ghe rispondo: “Ma go propio caro;
vurìa che anca mi, a la me ora,
i me cavasse su co’ le raìse,
par èssar strapiantà dove che i dise,
sia i canpi del Signore, là de sora”.
.

“L’ORTO” - Gisella Paolin

.

Lugo di Vicenza 2010

Filò con “EL GRASPO”
Circolo Poeti Dialettali Veneti

.

--- L’orto ---

Ne l’orto de drio casa,
a ranpegar sul muro
fiocheti de bonbasa
par quei co ‘l core duro,
ortighe on poco mate
che sveja i tananai
e fa vegner le gate
a chi no ride mai,
on bel peveronsìn
xe nato da lu solo
par darghe pì morbìn
a chi se sente molo
e core longo ‘l stroso
na magica semensa
e se te sì sustoso
te torna la passiensa.
Grassie a chel’orteselo
e a ‘e piante rancurà,
me par parfina belo
fin queo che no me va!

.

“TENPI DE ANCÒ” - Cecilia Casarotto

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- Tenpi de ancó ---

Col novo giuboto
e cena coscriti,
i schei soto soto
i va ziti ziti.
Par via del governo
le spese le aumenta:
rivasse ’l bel tempo
par farme contenta!
Ma mi me rassegno,
dò un calcio ai malani,
ben o mal me mantegno
sensa el peso dei ani.
Da bon o da scherso
el tenpo camina,
ma un feeling diverso
la xe medissina.
La vita xe quela,
inutile ’l pianto;
rendemola bela
con qualche bel canto.
.

“EL PENSIERO” - Mirta Fabris

.

Lugo di Vicenza 2010

Filò con “EL GRASPO”
Circolo Poeti Dialettali Veneti

.

--- El pensiero ---

Penso a chel filosofo che ga dito
che ’a nostra vita xe on “flash”, on afaciarse
a la finestra. Ga senso cargarse,
’lora me digo, ’l dolor de ogni sito?
Ma ghè ’l pensiero, Cartesio ga scrito,
che dà cossiensa de ’a vita. Straniarse
come se fa, de ’e anime care sparse
qua so la tera e là te l'infinito?
Mi ca credo a l'energia del pensiero
in vita e in morte e go gran fede in Dio,
in conpagnia del cor che xe sincero,
par mari, munti e celo mando ’l mio,
pregando che sia vero chel ca spero:

che ’l pensier nostro mai ’ndarà finìo.

.

“VARDARE INDRÌO” - Marcella Zordan

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- Vardare indrìo ---

Tra le foje che sgrensa soto i pìe
casca i maroni mati de la piassa:
“Pecà, penso, l'istà zé zà finìa”.
Da chi un poco zè utuno, n'altro, e i ragi
che spia i’ meso le rame, indora frasche.
E intanto ’l sole ne regala ’ncora
giorni che sluse, tiepidi e legeri.
E la gira, sta rua che no se ferma,
incolorir de rosso le piantà,
de viola e de maron, cavassi e siese
e i cavij, de ’n altro filo griso...
I boce che va scola fa le schinche
e i varda in su, par soto i maronari.
Paf, ’n altro colpo, e mi me volto indrìo
svejà da boti de canpane sorde
boti de tenpo... che no zè pì mio.
.

“L’AVE MARIA” - Carlo Ciscato

.
Lugo di Vicenza 2010

Filò con “EL GRASPO”
Circolo Poeti Dialettali Veneti

.

--- L' Ave Maria ---

Sento sonar canpane ne la sera,
òmini strachi torna sui so passi
e drio le rughe scolto 'na preghiera:
le man xe piene de cali e anca i brassi.

Sbasso la testa e me volto indrìo
e vedo el sole che pian pian tramonta
su n'altro giorno che xe za finìo
e rento al cor le storie lu me conta.

Stassera co’ le stele vui balare
par aspetar ciaror de n'antro giorno,
far festa fin matina e aspetare
tra el viola del tramonto tuto intorno.
Che bele le canpane ne la sera!
Le storie le me conta de la vita,
le sento ancora come che le gera
e rento al cor le m'à lassà na fita!
.

“A TI, SÌ!” - Tarcisia Dal Santo

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- A ti, sì ---

A ti sì, te darìa na gran medaja,
mama de sto toseto difarente;
te lo rancuri senpre te ‘a to gaia
no lagnàndote de fadighe e altro gnente.
Ti te sì tanto straca, e co’ i to brassi
te la tien streta al cor la to creatura;
no te protesti, 'n te domandi, no te lassi
scapar la calma, dandoghe a lu ogni cura.
Par ti l'è 'l mejo, l'è partìo dal core,
anca se l'è cressesto un poco storto:
pa’ sto motivo, elo l'è chel fiore
preferìo da Cristo in tel so orto.
Par ti l'è 'l mejo, l'è partìo dal core:
la to arma xe solo la passiensa.
'Ndoe se càta el dolore co’ l'amore,
serto el BON DIO darà na riconpensa.
.

“GNENTE FINISSE” - Leda Ceresara Rossi

.
Lugo di Vicenza 2010

Filò con “EL GRASPO”
Circolo Poeti Dialettali Veneti


.
--- Gnente finisse ---

Da ogni ramo nudo
del solitario vecio calicanto,
xe rispuntà de incanto
i bocoli de seda e de veludo.
Miracolo de un fiore
che me mostra la forsa de la vita
e in silensio me invita
a pensare che in tera gnente more.
Tuto ritorna vivo,
tuto rinasse, tuto se rinova,
come el vento e la piova,
come l'acoa che core drento 'l rivo.
Xe sempre nove in celo
le nuvole che l'aria porta a spasso,
l'erba inperlà de acoasso,
el pigolar del gnaro d'un oselo.
Torna ogni dì l'aurora
e torna el sole vivo a dar calore,
se fa somensa el fiore
par rifiorire e profumare ancora.
Gnente more o finisse,
tuto rinasse a nova primavera;
come el gran che va in tera,
anca la vita nostra rifiorisse.
.

“FILÒ TEL BOSCO” - MariaLinda Cicchelero

.

Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- Filò ’tel bosco ---

Celo da poco smorsà,
al girare de ’n sole canàja,
conduse ai meàle de le case
la note vestìa de scaltre lonbrìe.
Va ’l tasso, snasando ’l vento,
al late dolse del sorgo.
La volpe se cucia malandrina
a la ramà del saràjo, tegnendose
a mente cocodè e chichirichì.
Bona arimètica.
Bibistrèi zola in balade sbalède
risigando in pichiata spigoli intorcolà.
Bona giometria.
E parte ’l filò
’nte la granda fameja del bosco.
L’aloco, meso balbo, frugna ’tel scuro
pa’ on canto pì ciaro. Bububuuuu…
Ghe crìa la soéta co’ l’antico saver
de na vecia Maràntega. Ciuì, ciuì, ciuì, ciù…
Ogni pianta ride, nina
e conta la so storia con vosse de frasca,
drio ’l riciamo del vento
che de boto se stua ’pena el rossignolo
’ncantèsima chi parla e chi tase.
Intanto la luna, paróna de l’onda,
bruscheta ’l vestito del celo pa’ passare,
siòra ’legante, alta sóra i monte.
.

“ON SIOR POARETO” - Miranda Bille

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

- Un sior poareto -

Omo inportante,
come el to portafolio,
che sempre xe con ti
nel scarselon de la giacheta,
parsora al core.
Con lu, te cunpri grassie,
te paghi afeti
che ormai nessun
te vol pì regalare…
Re sensa trono!
Nel to castelo,
che ga tante finestre
par dominare el mondo
e stanse alte,
piene de marmi
e speci che i te riflete
somandote par sento,
te sì restà da solo;
e un sgrisolon de fredo
rento al core,
te parla de un’istà
ormai finìa.
.

“EL TAJAPAN” - Cecilia Tribbia

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- El taja-pan ---

Cossa ca pagarìa ancò
che al posto de un motorin
sentir sgrensare presto
l'arfio del taiapan
in volta par le contrà.
Padre nostro matiniero,
pin pian 'l segnava l'ora;
un relòio puntuale.
Mastegare ciope, crac, crac...
Caro vecio taiapan,
svejarin bonorivo
trato là par le cusine.
Gera belo sentire
'sto sóno nostran,
arpa de cornolaro
sonà da le man de me nona.
Mànego che briscolava,
cortelo fin, legno frùo.
El me svejava la matina,
co l'odor de late caldo,
el sole da na sfesa
e na campanela da scola.
E l'aria masenava incenso
insieme co’ i ciopuni de soéntre,
duri fa un quarelo,
veci un mese;ma da l'odore de celo.
.

“LA STRIA” - Galdino Pendin

.

Lugo di Vicenza 2010

Filò con “EL GRASPO”
Circolo Poeti Dialettali Veneti

.

--- La Stria ---

La calsa tacà su tel fogolare
col core che bateva d'emossion,
e in leto presto, sensa ciacolare
apena dite insieme le orassion.

No vol sentir rumori la befana,
ma boce chieti e specialmente boni,
che alora impiena 'e calse de bobana,
senò te mete tursi con carboni.

E naltri siti se dormiva in pressa
sognando na veceta bruta in facia,
el siale taconà con qualche pessa,
la voce rauca come na cornacia,

ma che gaveva un core generoso
e la savéa chi gera sta obediente
chi tento a scola e sempre un bravo toso,
e chi de bon no prometeva gnente.

E zo pa’ ’e scale in pressa la matina
curiosi de vardare se i regai
i gera quei segnà te ’a leterina
a chi spedìa no go savesto mai.

Bagigi, mandarini e de ’e carobe
missià co na brancà de caramele:
queste le gera le pì bone robe
e quasi ogni ano solo e sempre quele.

Co go capìo ndove abita la stria
l'incanto de chea note ze cessà;
anca l'età pì bela ze finìa
e ’l mondo pì incagnìo l'è deventà.

.

“EL VEDELO DE ORO” - Giuseppe Segalla

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- El vedèlo de oro ---

Dal Medioevo in qua soto san Piero,
on monte caro a tuti i Lugarini,
xe sepelìo on vedelo de oro vero
che vale no so quanti petachini.
Siccome le finanse del Comune
e fursi anca quele dei cristiani
le pianze e le cala fa le lune,
par liberarse on poco da sti afani
bisognarìa impiantare on comitato
che se meta a scavare soto là.
Tentativi i Busata i ghi n’à fato,
ma solo can da fogo i gà trovà.
La mejo penso, chi a vardarse intorno,
sarìa de scumissiare da su insima
e nare via a spianare torno torno,
a sbailà, drio man come a far rima.
Cussita on fià par volta se sgualiva
la val de l’Àstego e quela del Ciaón
e de sicuro, sensa pressa, riva
che se cata la bestia in discussion.
No go l’idea se spuntarà par prima
la coa, na recia o cossa del vedelo.
Na bruta sensassion me fa ca stima,
che no se vedarà gnente de belo.
Pitosto de ciapare quéa de l’oro,
ciapè la febre che ve arde in fronte.
Desmenteghève de chel gran tesoro
e assè che ‘a bestia dorma soto ‘l monte.
.

“L’ANUNCIO” - Floriano Zambon

.

Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- L’Anuncio ---

Pension che core, i ani a mesa via,
san in tel corpo e sgoèlto de parola,
el sercarìa catar na brava fiola
par continuar la strada in conpagnia.

L’anuncio el gera lì davanti ai oci,
in tel giornale verto sula tola;
la Pina, sinquant’ani, vita sola,
mai nessun che la tegna sui zenoci.

La pensa: “Quasi quasi fasso un pronto,
magari xe la volta ca sercavo!
Va ben che mi, da sola, me la cavo,
ma, miti che coel giusto ‘l sia lì sconto…”

Co i alsa, “Son la Pina, - la ghe dise -
go leto el vostro anuncio… bonassera,
a go na mesa idea, ma son sincera,
vorìa notissie un poco pì precise”.

“La varda, siora, qua xe l’agensìa,
ghe costa mile euro l’iscrission...”.
La Pina perde tuta l’emossion:
pagare par catar na conpagnìa !?

Ghe ocorarìa le tende del tinelo,
un par de scarpe nove co’ un pastran,
chi xe che no me dise che un doman
no riva, sensa spesa, un cor gemelo?

“La scusa, ma bisogna ca ghe pensa,
me vole qualche dì de riflession”.
La Pina canta za la so canson,e l’omo? “Beh, par desso fasso sensa!

“ONTO DE TASSO” - Fermino Brazzale

.
Lugo di Vicenza 2010

Filò con “EL GRASPO”
Circolo Poeti Dialettali Veneti
.

--- Onto de tasso ---

Na volta, par curar na malatia
che ‘l medico condoto inutilmente
el ghéa sercà de farme nare via,
a so’ ricorso a quelo che on sapiente,
Cerusico de piassa e gran Spessiale,
el nava proclamando tra la gente
come rimedio estremo de ogni male.
A tuti el ghe diséa con vosse forte
che contro macaùre e maruele,
orbìgoli, incalcade e brute storte
e altre malatie ancor pì rare
ghe vol la medissina popolare
co’ l’uso taumaturgico de l’onto:
quel de ‘a comare, del tasso o del serpente,
che da ogni male ‘l libera a l’istante.
Pa’ farla curta go curà on brasso
ondéndolo co’ l’onto, quel de tasso.
Guarìo grassie al rimedio de quel socio,
fin che par festegiare vo in cantina,
davanti casa vedo na ventina
de grossi can che me tegnéa de ocio.
Tuta colpa de na dimenticansa
ché, nel passare a quela operassion,
no go dà peso né giusta inportansa
a quéa che, come controindicassion,
diséa che usarlo gera grosso sbalio
se lì ghe fusse can… sensa guinsalio!
.
.

“LA VOLPE” - Claudio Cappozzo

.
.


Lugo di Vicenza
Filò con “EL GRASPO”

Circolo Poeti Dialettali Veneti

.
--- La Volpe ---

Fioca de fora e nevega a derli,
bianche le siese ai confini del canpo,
i cachi deventa spumilie pa’ i merli,
core i tusiti a fare ‘l so stanpo.
Le sama dal celo ste ave de argento:
ghi n’è che se ferma, na rama le orna.
Come i ricordi che uno ga rento,
ghi n’è che se desfa, ghi n’è che ritorna...
Pèche de volpe fin rente ’l punaro;
me nono che speta, note de luna...
La s-ciopa la varda zo verso ’l Valdaro;
onbre se move e ‘l vento le cuna.
“La sponta, sta’ fermo!, la pare decisa:
l’è propio on volpon, l’è grande fa on can!”
Ponta me nono co ’a mira precisa,
el colpo che parte se smorsa lontan.
Se svéja la note, la pare na guera,
vardemo la volpe distesa par tera.
Me nono ’l la varda e ’l bestema pinpian:
“Ah, toso, cramento!, a go copà ’l can! ....”
.