.
- I noni morusi -Leda Ceresara Rossi
Sarcedo, 8 febbraio 2010
.
La sera slongava
le ore inpigrìe,
el scuro portava
ricami de onbrie.
Du veci in cusina
davanti al camin,
la luna vissina
fasea da canfìn.
La nona filava
col fuso e la ròca
el nono vardava
col sigaro in boca.
Gnente altro i voleva
che starse darente
e i se la intendeva
anca sensa dir gnente.
S-ciocava el fogheto
mandando falive,
le ore dasieto
passava gualive.
La nona sercava
del nono la man
e lu pì no’l pensava
a inpissare el toscàn.
La luna vardando
con oci invidiusi
la stava spiando
du noni “morusi”
.
1 commento:
Go fato i oci lucidi, a lezerla <3 Stupenda
millo bozzolan
Posta un commento