Gisella Paolin - Sarcedo
Sento ani
Te sì un libro che gà un mucio de pagine,
mi le vardo par ben, le xè piene de storia,
le leso, le studio e vedo l’imagine
de tuti sti ani rento la to memoria.
Pì che te osservo e pì me par belo,
en meso ale rughe vedo la verità,
no, no ghe xè polvare nel to sarvelo,
te seiti usarlo e no’l xè gnancora fruà.
Te ghè passà tanti ani con passi decisi,
te ghè vivesto nel ben e purtropo do guere,
lo savemo, i dì no i xè senpre precisi
se incontra un bel sole, dele volte bufere.
Con amor e corajo i xè passà, dì par dì,
te sì el meio, mi te lo digo col core
e voria solo inparar tante robe da ti
che te soridi col beo e te fe fronte al dolore.
E se, sbrassolandote ben, forte e streto
mi podesse amalarme dea to malatia,
podaria inparare a restar pì discreta
e coi oci vardare con un fià pì alegria.
.
Nessun commento:
Posta un commento