UN MONDO DE SOGNO - Leda Ceresara Rossi

LUGO – 14 MARZO 2009
Filò col Graspo


UN MONDO DE SOGNO

(dedicata a Firmino Brazzale)
Te ‘l grande senario dei monti
la vita se fa generosa,
col rosso infogà dei tramonti,
co’ albe de argento e de rosa,
e ‘l blu de le note pì bele,
con pergole fate de stele.

E l’anima tua de poeta
te porta pa’ buschi e sentieri,
là dove la mente se chieta
e sensa pì ansia e pensieri
te scolti ogni àrfio, ogni vosse,
che solo ‘l to core conosse.

Co’ oci de eterno putelo
te vardi ‘l to mondo incantà,
spiando ogni gnaro de oselo
e l’àcoa del fosso che va,
un fiore che sbocia tra i sassi,
le pèche de ‘a volpe e dei tassi.

E quando te l’aria turchina
da l’alto del monte zolando
vien l’aquila, grande regina,
te ‘l core se fa ancor pì grando
e ancora pì vivo ‘l bisogno

de stare in sto mondo de sogno.

.

VOSSE DEL TENPO - Leda Ceresara

LUGO – 14 MARZO 2009
Filò col Graspo

Vosse del tenpo

Camino longo strosi che conosso
da sola, vao pianìn, contando i passi,
me ricordo ogni curva che fa ‘l fosso
e ‘l ciacolar de l’àcoa sora i sassi,
e ‘l pontesèl de legno dove ancora
le tole sgrensa a caminàrghe sora.

Da senpre qua ghe xe un silensio fondo
apena roto da un sospir de vento,
epure in te sta frégola de mondo
mile vosse me parla e mi le sento:
vosse fermà dal tenpo chi sa come
che me invita ciamàndome par nome.

El sole crea ricami de oro ciaro
filtrando de traverso tra le foje
e l’aria ga l’aroma dolse-amaro
de legno vecio, mus-cio e erbe moje;
le piante sentenàrie sa ogni storia
che me porto stanpà ne la memoria.

So che qua in fondo l’eco ghe xe ancora
e, se lo ciamo come da putela,
l’eco me dà risposta come alora,
però la vosse no me par pì quela,
e ‘l viso che se spècia drento al fosso

fursi l’è mio, ma no lo riconosso.

.

EL ME ALBU DE NOSSE - Gisella Paolin

LUGO – 14 MARZO 2009
Filò col Graspo

El me albu de nosse
Braghe scure e mantelina:
la sposa, na toseta,
se veste al’incontrario!
Làgrime cala dai oci
de oposte anbission:
rason smorsà de na mama
o sodisfassion de la novissa
piena de corajo?
Zobia, el dì pena comissià.
Poca zente, ai puareti
no ghe va drìo nissuni.
L’organo de ‘a cesa,
sonà da ‘n amigo,
smìssia le so note
co’ ‘l ciacolar pacioloso
de anime parbèn.
Su la tola, dopo,
polenta e luànega.
La neve, tanta e giassà,
se desfa al passare
dei nostri córi caldi.
La sera,
ne la casa che
no conosse fogo,

fa fiama la passion.

.

CHI - Tarcisia Dal Santo

LUGO – 14 MARZO 2009
Filò col Graspo

Chi

Chi coi penèi pitura,
chi sona el mandolin,
chi sta zugare a carte
tacà un bicer de vin.

Chi vanga tuto l’orto,
chi fa na passegiata,
chi fa un gireto in piassa
opur na scampagnata.

Chi va ne la palestra,
chi invesse va balare,
chi mena i boce a scola
pa’ sercar de jutare.

Chi propio no pol móvarse
parché ga dei problemi
dòpara la passiensa
pa’ stare pì sereni.

Chi che sta lì a pensare
“ansian no xe mia belo”
i daga l’esperiensa
pressiosa fa’ un giojelo.

Chi xe che sta disendo
che no serve i ansiani?
Lóri ne sta insegnando
a sperar nel “Domani”.
.

SÉNARE - Ruggero De Rosso

LUGO – 14 MARZO 2009
Filò col Graspo

Sénare

Sentìo zente

el tempo che va

colorando le ore

de sènare

ma confondendone

co mile mestieri

e co pensieri

che ne parla

de imortalità?!

Cossa faremo quando

rivaremo là

andove no ghe sarà

più gnente

de tuto questo

via de nostro Signore

ch'el speta?

Mi ve digo:"

Speremo ch'el rida!"

.

NINA NANA - Galdino Pendin

LUGO – 14 MARZO 2009
Filò col Graspo

Nina nana

Du ocioni che sluse dal sono
e na vose de mama che cuna;
dal celo tri quarti de luna
che varda sta séna incantà.

Pianpian le dó stele se smorsa,
se sente s-ciocare un baseto,
se posta le coèrte del leto,
se sente pregare cussì:

Signor che te guidi el futuro,
protegi sta me creatura,
la vita par lu sarà dura
te un mondo de rabia strapien.

In meso a le insidie del male
e la corussion de la gente,
conservalo sempre inocente;

Signore, me fido de Ti!

.

MODI DE DIRE DURANTE L’ANO - Bepin Daecarbonare

Da “Quatro Ciàcoe” de genaro 2009
Mensile de cultura e tradission vènete


- GENARO:
2 - S. Bovo - De S. Bovo la torta va al fogo. (torta fata de sangue de mas- cio).
6 - Epifania - La stria tute le feste scoa via.
17 - S. Antonio abate - S. Antonio fa el ponte e S. Paolo (25 genaro) lo ronpe.
20 - S. Sebastiano - S. Bastian co' la viola in man.
21 - S. Agnese - Da Sant'Agnese meso fen e mese spese.
22 - S. Vincenzo - S. Vincenzo da la gran fredura e S. Lorenso (10 agosto)da la gran calura, l'uno e l'altro poco dura.
- Quando el moscon camina de genaro, ciapa el rosegoto e mételo in granaro (far economia parché vien la carestia).
- De genaro tuti i gati va in gataro.

- FEBRARO:
2 - Candelora - Quando vien la Candelora da l'inverno semo fora, ma se piove o tira vento, ne l'inverno semo drento.
14 - S. Valentino - Par S. Valentin se veste 'l grande e anca el picinin.
- De S. Valentin fiorisse el spin.
- Febraro, febrareto curto e maledeto.

- MARSO:
19 - S. Giuseppe - Par S. Giusepe se buta via le grepe.
21 - S. Benedetto - Da S. Benedeto la sisila ze sul teto.
25 - Annunciazione - A Santa 'Nunziata se buta via la pignata (scaldin).
- De marso, ogni mato va descalso.
- Marso suto, aprii bagna, beato 'l contadin che ga semenà.
- Marso marson, tri dì de aqua e uno de bon.

- APRILE:
1-2-3 - Primi tre aprilanti, quaranta somejanti.
23 - S. Giorgio - Se piove da S. Giorgio, carestia de fighi.
25 - S. Marco - Quando S. Marco pasquarà tuto '1 mondo tremarà.30 - S. Caterina - Da S. Catarina da la stala a la cusina.
- Voja o no voja, a Pasqua ghe ze la foja.

- MAGIO:
1 - El primo de ghirlanda, quaranta dì comanda.
3 - S. Croce - Se piove da Santa Croce, va sbuse le nose.
4 - Ascensione - Se piove el dì de l'Assensa, el boaro perde la somensa.
25 - S. Urbano - Da S. Urbano, siarése a piene man.
- Majo ortolan, tanta paja e poco gran.
- De majo canta i mussi.

- GIUGNO:
11 - S. Bàrnaba - San Bàrnaba e san Simon, tegnime lontan da la sita e dal ton.
15 - S. Vito - Par San Vio, le siarese ga el marìo (verme).
29 - S. Pietro - Se piove de S. Piero, piove nel caliero.
- El mese de giugno inpiena el pugno (co la falsa in pugno).
- LUjO:
12 - S. Fortunato - De S. Fortunà, bravi quei che ga sapà.
22 - S. Maddalena - De S. Madalena, la nosa la ze piena.
26 - S. Anna - A S. Ana, la piova la ze na mana.
- Có le nuvole va al mare, toi sù i bo e va arare.

- AGOSTO:
1 - Al primo de agosto, le ànare se mete a rosto.
2 - Dal Pardon se tra la sapa te on canton.
7 - S. Gaetano - La verza de S. Ghitan i poi piantàrsela in man.
15 - Assunzione - L'aqua de la Madona l'è ancora bona.
16 - S. Rocco - De S. Roco, le nose va in sgaboto.
- Agosto maùra e setembre vendema.

- SETENBRE:
9 - S. Gregorio - Se piove de S. Gorgon, 7 brentane e on brentanon.
16 - S. Eufemia - Par Sant'Eufemia scomissia la vendemia.
21 - S. Matteo - De S. Matio ogni fruto l'è conpìo, el bel tenpo ze finìo e le vache torna indrìo.
- A luna setenbrina, sete lune se ghe inchina.

- OTOBRE:
7 - S. Giustina - Da S. Giustina l’ua rabosa deventa marzemina.
16 - S. Gallo - Se fa belo a S. Gai, fa belo fin Nadal.
28 - S. Simeone - A S. Simon se cava la ravissa e anca el ravisson.
- De ua marzemina gh'in va poca su la tina, e quela che la va la ze tuta becolà.

- NOVENBRE:
1 Ognissanti - Se tuti i Santi ronpe 'l tenpo, i morti lo justa.
- Fin ai Santi la somensa se porta su i canpi, da i Santi in là la se porta a ca', a san Martin la se porta al mulin.
11 - S. Martino - Da S. Martin l'inverno ze in camin.
- L'istadela de S. Martin dura tre jorni e un pochetin.
30 - S. Andrea - Da S. Andrea el fredo bècola.

- DISSENBRE:
2 - S. Bibiana - Se piove el dì de S. Bibiana, 40 dì e 'na stimana.
6 - S. Nicola - Vegnarò sa podarò (la neve).
13 - S. Lucia - Da Santa Lùssia el fredo crussia.
21 - S. Tommaso - Da S. Tomìo a Nadal i dì se slonga un pìe de gal.
25 - S. Natale - Nadale coi tui e Pasqua con chi che te vui.- La neve dessenbrina sete volte se raffina.