ISTÀ DEL SESSANTA - Floriano Zambon

La canta la Pósena in meso i so sassi,
e zo a le Fusìne i bate le ore,
me sguìssa un orbéto intrameso i cavassi,
distaco ‘l pensiero da l‘ora che core.

Me vedo lì, bòcia, ca ciapo marsùni
col saco, un stropón ghe tien verta la boca,
co l‘àcoa giassà che me riva ai galùni,
atento a rumàr solo indóe che se toca.

Là su par la vale i bate le broche,
i fassi de legne i core sul fero,
calcùn cata funghi intorno a le soche,
el tenpo che passa el core lesiéro.

Istà del sessanta, distante na vita,
poaréta de schei, ma de sogni na siora,
na cuna indorà de na storia mai scrita,
paréa tuto belo, de drento e de fora.

Ma ‘l tenpo, se sa, l‘è na strada in salita,
el passo se intràja, el fagòto te pesa,
ancò na vitoria, doman na sconfita,
tegnere ‘l bon passo deventa un‘inpresa.

Ah, coànto ca sogno i marsùni, i cavassi,
el bàtare seco de tanti martèi,
el canto de l'àcoa che core sui sassi,
el vìvar contento dei ani pì bei.