LE CONTRÀ - Firmino Brazzale

Le xe ancora bele le nostre contrà,
le contrà do ca semo nati.
I xe puchi ancó quìi che pol dire
de èssere nati te na camaréta,
so on leto de legno de siaresara,
a du passi da l’orto, dal prà
o da na fila de maronari
dove la sera ‘e cornace
se posa a parlare de morti.
Lì, te le contradèle,
durante le sere tranquile,
vardemo come na volta ‘l tramonto
del sole drio le montagne.
E chi sa se a che l’ora,
tra le onbre de i boschi e i gorghi de ‘a vale,
se svéja de novo le ultime anguàne!
Lì, te sta tera libera e cara,
da on poco de tenpo rivedo
tosìti che core continti te l’erba
fin che torna a brilare na stela.
Sarìa belo che sta picola patria
la fusse in grado de salvare
anca i quatro ossi che za xe stà nostri,
e intanto che la conserva ‘e soménse
dei tusi pì dóvene,
i nostri veci polesse dormire
soto le lastre, de fianco a la cesa.