sabato 22 marzo 2008

SILENSI - Carlo Ciscato

A go scoltà el rumore dei silensi,
na sera pena el sole xe nà soto;
la pace go sentìo ne i me sensi
come inbriagà dal profumar del loto.

Silensi rento un bosco de montagna,
silensi sora un celo pien de stele;
silensi su le onbre de ‘a canpagna,
silensi sora un mare co le vele.

Silensi de na ava sora un fiore,
silensi che me ride da la luna;
silensi, vento che urla e dopo el more,
silensi de na mama su la cuna.

E lì me perdo nel scoltar le vosse
portà dal vento che in silenzio el canta,
orassion e pianti lenti come giosse
che rento el core mio ghe verze ‘a porta!!

Nessun commento: