SORÀJA - Giuseppe Segalla

Miti na tigre in pìcolo,
co’ la pelicia folpa a strisi falbi,
na cóa che la pare on monumento
e, al colo, na criniera da leon.
Se la te inpira co’ i so oci verde,
te resti incantismà par no so quanto.
Questa la xe Soraia, la me gata.
Pena che la me incontra, la matina,
la me fa ciao fruscandome sol muso.
No te poi imaginare che discursi
ca nemo a inpiantar su mi e la me gata:
na frase mi, e suìto on sgnàolo ela,
e vanti e vanti fin che no ‘a se straca.
Se te vidi me fiolo che va in bici
co’ na siarpa pì grossa del normale,
ti varda ben parché la xe Soraia
incoatà sol colo pa’ far viajo.
De note, se ‘a ga voja de magnare,
la vien sercarme anca sa so’ in leto
e co’ la sata e co’ na gran maniera,
la raspa lì vissin a le me rece
e dopo, a sgnàoli, la me guida al frigo.
Altro no digo. No, no digo altro
parché no vorìa propio farte voja
de vegnérme a robare sto gioielo.