VOSSE DEL TENPO - Leda Ceresara

Camino longo strosi che conosso
da sola, vao pianin contando i passi,
me ricordo ogni curva che fa ‘l fosso
e ‘l ciacolar de l’àcoa sora i sassi
e el pontesel de legno, dove ancora
le tòle sgrénsa a caminarghe sora.

Da senpre qua ghe xe un silenzio fondo
apena roto da un sospir de vento,
epure in te sta frégola de mondo
mile vosse me parla e mi le sento,
vosse fermà dal tenpo chi sa come
che me invita ciamàndome par nome.

El sole crea ricami de oro ciaro
filtrando de traverso tra le foje
e l’aria ga l’aroma dolse-amaro
de legno vecio, mùs-cio e erbe moje,
le piante sentenàrie sa ogni storia
che me porto stanpà ne la memoria.

So che qua in fondo l’eco ghe xe ancora
e se lo ciamo come da putela
l’eco me dà risposta come alora,
però la vosse no me par pì quela
e el viso che se specia drento al fosso
fursi l’è mio, ma no lo riconosco.